2 மக்கபே ஆகமம் - பழைய ஏற்பாடு

¹ தலைமைக்குருவான ஓனியாசுடைய பக்தியையும், பாவத்தின் மீது அவர் கொண்ட வெறுப்பையும் முன்னிட்டுப் புனித நகர் சமாதானத்தில் இருந்தது. கட்டளைகளும் நுணு நுணுக்கமாய் அனுசரிக்கப் பட்டன.

² அரசர்களும் பிரபுக்களும் அவ்விடம் வணக்கத்திற்கு உகந்தது என்று எண்ணினார்கள். ஆதலால், கடவுள் ஆலயத்தை மிகவும் விலையுயர்ந்த காணிக்கைகளால் சிறப்பித்தார்கள்.

³ எப்படியென்றால், ஆசியா அரசனான செலேயுக்கஸ் கூடப் பலிகளை நடத்துவதற்கு உதவியான எல்லாச் செலவுகளையும் தன் வருமானத்தினின்று கொடுத்தான்.

⁴ கடவுள் ஆலயத்துக்குத் தலைவனாக நியமிக்கப்பட்ட பென்யமீன் கோத்திரத்தானான சீமோன் என்பவனோ தலைமைக்குரு தன்னை எதிர்த்த போதிலும், நகரில் அநீதமான காரியத்தைச் செய்ய முயன்றான்.

⁵ ஆனால், ஓனியாசை வெல்லக் கூடாமையால், செலேசீரியா பெனிசியா நாடுகளில் அக்காலத்தில் படைத்தலைவனாய் இருந்த தார்சேயின் புதல்வன் அப்பொல்லோனியுசிடத்தில் வந்து,

⁶ யெருசலேமில் பணம் நிறைந்த கருவூலம் இருக்கிறது என்றும், திரண்ட பொதுப்பணம் ஏராளமாக உண்டு என்றும், அவை பலியிடும் காரியத்துக்குத் தேவையில்லை என்றும், அவை முழுவதும் அரசனுடைய கையில் விழக்கூடும் என்றும் அறிவித்தான்.

⁷ பணத்தைப் பற்றித் தான் கேட்டவைகளை அப்பொல்லோனியுஸ் அரசனிடம் தெரிவித்த போது, அவன் தன் செயலனான எலியோதோருசை அழைத்து, மேற்சொல்லிய பணத்தை எடுத்து வரும்படி கட்டளை கொடுத்து அனுப்பினான்.

⁸ உடனே எலியோதோரூஸ் செலேசீரியா, பெனிசியா நகரங்களைப் பார்க்கச் செல்பவன் போலத் தோன்றினாலும் உண்மையில் அரசனுடைய கருத்தை நிறைவேற்றுவதற்கே புறப்பட்டான்.

⁹ ஆனால், அவன் யெருசலேம் வந்து, நகரத்தில் தலைமைக்குருவால் மரியாதையாய் ஏற்றுக் கொள்ளப்பட்ட போது, பணம் இருக்கிறதென்று தனக்குச் சொல்லப்பட்ட செய்தியை அறிவித்தான்@ தான் வந்த கருத்தையும் வெளிப்படுத்தினான்: உண்மையாகவே பணம் உண்டோ என்றும் கேட்டான்.

¹⁰ அப்போது தலைமைக்குரு: அவை பொதுப்பணம் என்றும், விதவைகளுடையவும் அனாதைப் பிள்ளைகளுடையவும் பொருள் என்றும் தெரியப்படுத்தினார்.

¹¹ மேலும், தீயவனான சீமோனால் சொல்லப் பட்டவைகளில் சில, மாண்பு மிக்க இர்க்கானுஸ் தோபியாசுக்குச் சொந்தம் என்றும், வெள்ளியில் நாற்பது தாலேந்துகளும், பொன்னில் இருநூறு தாலேந்துகளும் மட்டுமே இருக்கின்றன என்றும்,

¹² வணக்கத்தையும் புனிதத்துவத்தையும் முன்னிட்டுப் பூமியெங்கும் மதிக்கப்படும் இடத்திலும், கடவுள் ஆலயத்திலும் நம்பிக்கை வைத்தவர்களை ஒருபோதும் மோசம் செய்யக் கூடாது என்றும் சொன்னார்.

¹³ ஆனால் எலியோதோருஸ், அரசனால் தனக்குக் கொடுக்கப்பட்டிருந்த கட்டளைப்படி, பொருட்கள் அனைத்தும் அரசனிடம் கொண்டு போகப் படவேண்டும் என்றும் சொன்னான்.

¹⁴ ஆதலால், இவைகளை நிறைவேற்ற ஒருநாளை நியமித்து எலியோதோருஸ் கடவுள் ஆலயத்துள் புகுந்தான். நகர் முழுவதும் உண்டான பயம் சிறிதன்று.

¹⁵ குருக்கள் தங்கள் குருத்துவ ஆடைகளோடு பீடத்துக்கு முன்பாக நெடுங்கிடையாய் விழுந்து, பொதுப்பணத்தில் பங்குள்ளவர்களுக்கு அதைக் காப்பாற்றிக் கொடுக்கும்படி, பொதுபணத்தைப் பற்றிய சட்டத்தை ஏற்படுத்தியவரான விண்ணில் இருப்பவரை வேண்டிக் கொண்டார்கள்.

¹⁶ அப்போது தலைமைக்குருவின் தோற்றம் பார்ப்பதற்கு இதயத்தைப் புண்படுத்துவதாய் இருந்தது. ஏனென்றால், அவர் முகமும் நிறமாற்றமும் அவரது ஆன்மாவிலுள்ள துயரத்தை வெளிப்படுத்தின.

¹⁷ ஏனென்றால், பயமும் உடல் நடுக்கமும் அம்மனிதரை ஆட்கொண்டிருந்தன. அவரைப் பார்த்தவர்களுக்கு அவர் இதயத்தில் உறைந்து கிடந்த நோவை அவை தெளிவாகக் காட்டின.

¹⁸ மக்களும் வீடுகளினின்று கும்பல் கும்பலாய் ஓடிவந்தார்கள்@ கடவுள் ஆலயம் அவமதிக்கப்படப் போவதைக் கண்டு வெளிப்படையாய் மன்றாடினார்கள்.

¹⁹ பெண்கள் தோள் வரைக்கும் தவச் சட்டைகளை அணிந்து கொண்டு தெருக்களில் கூடினார்கள். அடைபட்டிருந்த கன்னியர்களில் சிலர் ஓனியாசிடம் ஓடினார்கள்@ சிலர் சுற்று மதிலுக்கு ஓடினார்கள்@ சிலர் பலகணிகள் வழியாய்ப் பார்த்துக் கொண்டிருந்தார்கள்.

²⁰ எல்லாரும் விண்ணை நோக்கித் தங்கள் கைகளை விரித்து மன்றாடினார்கள்.

²¹ கலக்கமுற்றிருந்த கும்பலினுடையவும், பெரிதும் வருத்தமடைந்திருந்த தலைமைக் குருவினுடையவும் ஏக்கம் மிகவும் துயரத்துக்குரியதாய் இருந்தது.

²² தங்களிடம் ஒப்புவிக்கப்பட்டவை ஒப்புவித்தவர்களுக்காக முழுமையும் காப்பாற்றப்படும்படிக்கு எல்லாம் வல்ல கடவுளை அவர்கள் மன்றாடினார்கள்.

²³ எலியோதோருசோவென்றால் தான் சொல்லியதை நிறைவேற்ற, தானே தன் ஊழியரோடு கருவூலம் இருந்த இடத்திற்கு வந்தான்.

²⁴ ஆனால், தமது மாட்சியின் அடையாளத்தை வெளிக்காட்ட எல்லாம் வல்ல கடவுள் திருவுளங்கொண்டார். ஆதலால், அவனுக்குக் கீழ்ப்படியத் துணிந்தவர்கள் எல்லாரும் கடவுளுடைய வலிமையால் விழத்தாட்டப்பட்டார்கள். பயமும் கலக்கமும் அவர்களை ஆட்கொண்டன.

²⁵ பயங்கரத்துக்குரிய ஒருவர் ஒரு குதிரை மேல் தோன்றினார். அவர் விலையயுர்ந்த ஆடைகளை அணிந்திருந்தார். குதிரை தன் முன்னங்கால்களினால் எலியோதோருசை வலிமையுடன் உதைத்தது. அதன் மேல் இருந்தவரோ பொன்னாயுதங்கள் வைத்திருப்பதாகத் தோன்றினார்.

²⁶ வலிமையை அணியாகக் கொண்டு, மாட்சியால் உயர்ந்து, அழகான ஆடைகள் அணிந்திருந்த வேறு இரு இளைஞர்களும் தோன்றினார்கள். அவர்கள் அவனை வளைத்து இருபுறத்திலும் நின்று கொண்டு, விடாமல் அடித்துக் காயப்படுத்தினார்கள்.

²⁷ திடீரென எலியோதோருஸ் தரையில் விழுந்தான். காரிருள் அவனைச் சூழ்ந்தது. அவனைத் தூக்கி ஒரு நாற்காலியில் வைத்து வெளியே கொண்டு சென்றார்கள்.

²⁸ முன் சொல்லிய கருவூலத்தில் பல காலாட்களோடும் ஏவல்களோடும் புகுந்த அவன் ஒருவருடைய உதவியும் இல்லாமல் வெளியே கொண்டு போகப்பட்டான். இதில் கடவுளின் வல்லமை வெளிப்படையாய்த் தெரிந்தது.

²⁹ கடவுளின் வல்லமையால் அவன் பேச்சில்லாமலும், யாதொரு நம்பிக்கையும் உதவியுமில்லாமலும் கிடந்தான்.

³⁰ அவர்களோ ஆண்டவரைப் போற்றினார்கள். ஏனென்றால், அவர் தமது இடத்தை மாட்சிப்படுத்தினார். சிறிது நேரத்துக்கு முன் பயத்தாலும் கலக்கத்தாலும் நிறைந்திருந்த கடவுள் ஆலயம், எல்லாம் வல்ல ஆண்டவர் தோன்றவே, அக்களிப்பாலும் அகமகிழ்வாலும் நிரப்பப்பட்டது.

³¹ அப்போது எலியோதோருசுடைய நண்பரில் சிலர் குற்றுயிராய்க் கிடந்த அவனுக்கு உன்னத கடவுள் உயிர்க் கொடுக்கும்படி, ஓனியாஸ் உடனே மன்றாடவேண்டும் என அவரைக் கேட்டுக் கொண்டார்கள்.

³² யூதரால் எலியோதோருசுக்குத் தீமை செய்யப்பட்டதென்று அரசன் ஐயுறுவானென்று தலைமைக் குரு எண்ணி, அவன் உடல் நலம் பெற (ஆரோக்கிய) பலி ஒப்புக்கொடுத்தார்.

³³ தலைமைக்குரு மன்றாடிய போது, அதே இளைஞர்கள் முன் போலேவே ஆடை அணிந்து கொண்டு எலியோதோருசுக்குத் தம்மைக் காண்பித்து: ஓனியாஸ் குருவுக்கு நன்றிகூறு@ ஏனென்றால், அவரை முன்னிட்டு ஆண்டவர் உனக்கு உயிரளித்தார்.

³⁴ கடவுளால் தண்டிக்கப்பட்ட நீயோ கடவுளுடைய மாட்சியையும் வலிமையையும் எல்லாருக்கும் தெரியப்படுத்து என்று சொல்லி, மறைந்து போனார்கள்.

³⁵ எவியோதோருஸ் கடவுளுக்குக் காணிக்கை ஒப்புக்கொடுத்து, தனக்கு உயிர்கொடுத்தவருக்குப் பெரிய வாக்குறுதிகளைச் செய்து, ஓனியாசுக்கும் நன்றிசெலுத்தி, தன் படையைக் கூட்டிக் கொண்டு அரசனிடம் திரும்பினான்.

³⁶ தன் கண்கள் கண்ட கடவுளுடைய அரும்பெரும் செயல்களைப் பற்றி அனைவருக்கும் சான்று பகர்ந்தான்.

³⁷ யெருசலேமுக்கு மறுபடியும் அனுப்புவதற்கு எவன் தகுதியானவனென்று, அரசன் எலியோதோருசைக் கேட்டபோது, அவன்:

³⁸ உமக்கு யாரேனும் பகைவன் இருந்தால், அல்லது உமது அரசைக் கைப்பற்றத் தேடுகிறவன் யாரேனும் இருந்தால், அவனை அவ்விடம் அனுப்பும். அவன் அடிபட்டுத் தப்பி வருவானேயாகில், அவனை நீர் திரும்ப ஏற்றுக் கொள்வீர். ஏனென்றால், அவ்விடத்தில் உண்மையாகவே கடவுளின் வல்லமை விளங்குகின்றது.

³⁹ ஏனென்றால், விண்ணில் வாழ்கிறவரே அவ்விடத்தைச் சந்நிப்பவரும், அதற்கு உதவி செய்கிறவருமாய் இருக்கிறார். அவ்விடத்தில் தீமை செய்ய வருகிறவர்களைத் தண்டித்து அழித்தொழிக்கிறார் என்றான்.

⁴⁰ இவ்வாறு தான் எலியோதோருசுக்கும் நடந்தது@ கருவூலம் காப்பாற்றப்பட்டது.