குறுந்தொகை - 386. நெய்தல் - தலைவி கூற்று
(தலைவன் பிரிந்த காலத்தில் ஆற்றவேண்டுமென்று வற்புறுத்திய தோழியை நோக்கி, “மாலைக்காலத்தில் காமநோய் மிகுவதனால் துன்புறுகின்றேன்” என்று தலைவி கூறியது)
| வெண்மணல் விரிந்த வீததை கானல் தண்ணந் துறைவன் தணவா ஊங்கே வாலிழை மகளிர் விழவணிக் கூட்டும் மாலையோ அறிவேன் மன்னே மாலை நிலம்பரந் தன்ன புன்கணொடு |
5 |
| புலம்புடைத் தாகுதல் அறியேன் யானே. | |
| - வெள்ளிவீதியார். |
தோழி! வெள்ளிய மணல் பரவிய மலர்கள் செறிந்த சோலையையுடைய தண்ணிய கடற்றுறையையுடைய தலைவன் என்னைப் பிரியாதமுன்காலத்தில் யான்! தூய அணிகலன்களை யணிந்த மகளிர் விழவுக்குரிய அலங்காரங்களைத் தொகுக்கின்ற மாலைக்காலத்தையே அறிவேனாயினேன்; இனி அது கழிந்தது! அம்மாலைக் காலம் பூமி பரந்தது போன்ற பெரியதுன்பத்தோடு தனிமையைஉடையதாதலை அப்பொழுது அறியேன்.
முடிபு: துறைவன் தணவாவூங்கு யான் மகளிர் அணி கூட்டும் மாலையோ அறிவேன்மன்! மாலை புலம்புடைத்தாகுதல் அறியேன்.
கருத்து: தலைவரது பிரிவினால் மாலையில் என்பால் துன்பம் மிக்கது.
தேடல் தொடர்பான தகவல்கள்:
குறுந்தொகை - 386. நெய்தல் - தலைவி கூற்று, இலக்கியங்கள், தலைவி, அறியேன், நெய்தல், குறுந்தொகை, மகளிர், கூற்று, மாலை, யான், மாலையோ, தலைவன், எட்டுத்தொகை, சங்க, துறைவன், கூட்டும்