குறுந்தொகை - 313. நெய்தல் - தலைவி கூற்று

பெருங்கடற் கரையது சிறுவெண் காக்கை நீத்துநீர் இருங்கழி இரைதேர்ந் துண்டு பூக்கமழ் பொதும்பிற் சேக்குந் துறைவனொடு யாத்தேம் யாத்தன்று நட்பே அவிழ்த்தற் கரிதது முடிந்தமைந் தன்றே.	5
- ......

தோழி! பெரிய கடற்கரையின் கண்ணதாகிய சிறியவெண்மையையுடைய காக்கையானது வெள்ளமாகிய நீரையுடைய கரியகழியிடத்து மீனாகிய இரையைத் தேடி உண்டு மலர் மணம் வீசும்சோலையினிடத்துத் தங்கும் துறையையுடைய தலைவனோடு நம்மைக் கட்டினேம்; அங்ஙனம் கட்டப்பட்ட நட்பு நன்றாகப் பொருந்தியது; அது பிறராற் பிரித்தற்கு அரியதாகி முடிக்கப்பட்டு அமைந்தது.

முடிபு: துறைவனோடு யாத்தேம்; நட்புயாத்தன்று; அது அவிழ்த்தற்கரிதாகி, முடிந்தமைந்தன்று.     

கருத்து: தலைமகனது நட்பு அழியாதது.