குறுந்தொகை - 249. குறிஞ்சி - தலைவி கூற்று
(தலைவன் வரைவிடை வைத்துப் பிரியும் காலத்தில், தன்னை நோக்கி, "நீ ஆற்றும் ஆற்றல் உடையையோ?" என்ற தோழிக்கு, "அவர் மலையைக் கண்டு ஆற்றுவேன்" என்பது படத் தலைவி கூறியது.)
| இனமயில் அகவு மரம்பயில் கானத்து நரைமுக ஊகம் பார்ப்பொடு பனிப்பப் படுமழை பொழிந்த சாரலவர் நாட்டுக் குன்ற நோக்கினென் தோழி பண்டை யற்றோ கண்டிசின் நுதலே. |
5 |
| - கபிலர். |
தோழி! திரளாக உள்ள மயில்கள் ஆரவாரிக்கும் மரங்கள் செறிந்த காட்டிடத்தில் வெள்ளை முகத்தை உடைய கருங்குரங்கு குட்டிகளோடு குளிரால் நடுங்கும்படி ஒலிக்கின்ற மழை பொழிந்த மலைச் சாரலை உடைய அத் தலைவரது நாட்டில் உள்ள குன்றத்தை பார்த்தேன்; அதனால் ஒளி இழந்து பசப்பூர்ந்த என் நெற்றி பசப்பூராத பழைய தன்மை உடைய தாயிற்றோ? பார்ப்பாயாக.
முடிபு: தோழி, அவர் நாட்டுக் குன்றம் தோக்கினென்; நுதல் பண்டையற்றோ? கண்டிசின்.
கருத்து: தலைவருடைய குன்றத்தை நோக்கி ஆற்றி இருப்பேன்.
தேடல் தொடர்பான தகவல்கள்:
குறுந்தொகை - 249. குறிஞ்சி - தலைவி கூற்று, இலக்கியங்கள், தலைவி, உடைய, குறிஞ்சி, குறுந்தொகை, தோழி, கூற்று, கண்டிசின், குன்றத்தை, உள்ள, நோக்கி, எட்டுத்தொகை, சங்க, அவர், பொழிந்த, நாட்டுக்