குறுந்தொகை - 113. மருதம் - தோழி கூற்று
(பகற்குறியின்கண் வந்து அளவளாவிய தலைவனுக்குத் தாம் பயிலும் இடத்தை மாற்றி வேறிடங்கூறுவாளாய், “தலைவி காட்டாற்றங் கரையிலுள்ள பொழிலுக்கு எம்முடன் வருவாள்” என்று ஆண்டு வரும் வண்ணம் குறிப்பாகத் தோழி கூறியது.)
| ஊர்க்கும் அணித்தே பொய்கை பொய்கைக்குச் சேய்த்தும் அன்றே சிறுகான் யாறே இரைதேர் வெண்குரு கல்ல தியாவதும் துன்னல்போ கின்றாற் பொழிலே யாமெம் கூழைக் கெருமண் கொணர்கஞ் சேறும் |
5 |
| ஆண்டும் வருகுவள் பெரும்பே தையே. | |
| - மாதீர்த்தனார். |
தலைவ! பொய்கை! ஊருக்கும் அருகிலுள்ளது; சிறிய காட்டாறு அப்பொய்கைக்குத் தூரியதும் அன்று; அணிமையிலே உள்ளது; அங்குள்ள சோலை அப்பொய்கையிலும் யாற்றிலும் உணவை ஆராய்கின்ற வெள்ளிய நாரைகளை அன்றி வேறு எவ்வுயிரும் நெருங்கல் ஒழிந்ததாகும்; நாங்கள் எமது கூந்தலுக்கு இட்டுப் பிசையும் பொருட்டு எருமண்ணைக் கொணர் வேமாய் அங்கேசெல்வேம்; பெரிய பேதைமையையுடைய தலைவி அங்கும் வருவாள்.
முடிபு: பொய்கை ஊர்க்கும் அணித்து; யாறு சேய்த்து மன்று; பொழில் யாவதுந் துன்னல் போகின்றது; யாம் சேறும்; பெரும்பேதை ஆண்டும் வருகுவள்.
கருத்து: பொய்கைக்கு அணித்தாகிய காட்டாற்றின் கரையிலுள்ள பொழிலகத்தே தலைவியைக் கண்டு அளவளாவலாகும்.
தேடல் தொடர்பான தகவல்கள்:
குறுந்தொகை - 113. மருதம் - தோழி கூற்று, தோழி, இலக்கியங்கள், பொய்கை, கூற்று, குறுந்தொகை, மருதம், சேறும், ஆண்டும், வருகுவள், கரையிலுள்ள, எட்டுத்தொகை, சங்க, ஊர்க்கும்