சிங்கப்பூரில் தமிழ் நாடகம்.... தற்குறிகளின் கொலு - நாடகக் கலைக் கட்டுரைகள்
நாடக வடிவம், உள்ளடக்கம், அவைக்காற்று முறை ஆகியவற்றில் சோதனைகள் செய்து சிங்கப்பூரில் தமிழ் நவீன நாடகத்தைப் பற்றிய விழிப்புணர்வையும் புதிய அனுபவங்களையும் தரிசனங்களையும் ஏற்படுத்தும் நோக்கத்தில், 1991 ஆகஸ்டில் 'அக்கினிக்கூத்து' என்ற பெயரில் இருமொழி நாடகக்குழு தேன்மொழியின் தலைமையில் தோற்றம் கண்டது. அக்கனிக்கூத்து, ந.முத்துசாமியின் கூத்துப்பட்டறையுடன் இணைப்பை ஏற்படுத்திக் கொண்டது. அக்கினிக்கூத்தின் பிரதான நாடக எழுத்தாளராகவும் இயக்குநராகவும் இளங்கோவன் இயங்க, இன்றுவரை பதினேழு நாடகங்களை அக்கினிக்கூத்து அரங்கேற்றியுள்ளது.
அக்கினிக்கூத்தின் நாடகங்கள் 'புரோஸ“னிய' (Proscenium) படச்சட்ட முகப்பு மேடையைத் தவிர்த்து சப்-ஸ்டேஷன் (Substation) எனும் சிற்றரங்கில் வட்டக்களரி போன்ற அரங்கமைப்பில் நிகழ்ந்தன. சிங்கப்பூர் தமிழ் நாடகத்துறையில் ஒரு மாறுபட்ட குரலாக அக்கினிக்கூத்து உருவானது. கலாசார பரிமாற்றத் தயாரிப்புகளிலும் அக்கினிக்கூத்தின் பங்கு குறிப்பிடத்தக்கது. கோ பாங் கூன் (Kuo Pao Kun), ஹான் லாவோடா (Han Laoda) ஆகியோரின் சீன நாடகங்களையும், இந்தியாவின் பாதல் சர்க்கார், இத்தாலியின் டாரியோ ஃபோ (Dario Fo) போன்றோரின் படைப்புகளை அரங்கேற்றியுள்ளது. ஃபோவின் Accidental Death of an Anarchistடை (விபத்து) அக்டோபர் 93ல் அக்கினிக்கூத்து அரங்கேற்றியபோது பெரும் சர்ச்சைக்குள்ளானது. சிங்கப்பூரில் 18 வயதுக்குக் குறைந்தவர்கள் பார்க்கத் தடைவிதிக்கப்பட்ட முதல் தமிழ் நாடகம் இதுதான். நாடகத்தின் விசாரணைக் காட்சி வசனங்களில், கிறுக்குக் கதாபாத்திரத்தை விசாரிக்கும் காவல் துறையின் மொழிச் சித்ரவதைக்காக தமிழருக்கே உரித்தான "கெட்ட வார்த்தைகளை"ப் பயன்படுத்தும்போது, திட்டமிட்டே பார்வையாளர்களை ஏற்பாடு செய்திருந்த "தமிழ்ப் பண்பாட்டின்" காவல் தெய்வங்கள் சிலர் கலாட்டா செய்தனர். மற்ற பார்வையாளர்களையும் தூண்டிவிட்டு வெளிநடப்பு செய்ய வைத்தனர். பதிவு நாடாக்களைக் கொண்டு வந்து நாடகத்தைப் பதிவு செய்ய முயன்றனர். நாடகத்துக்கு தணிக்கைக் குழுவின் 'Restricted Artistic - (18 Years and above) 18 வயதுக்கு மேல் என்ற சலுகை வழங்கியிருந்ததை மறந்து சத்தம் போட்டனர். காவல் துறையினர் அழைக்கப்பட்டு பிறகு நாடகம் தொடர்ந்தது.
மறுநாள் ஆங்கில நாளிதழில் பார்வையாளர்களின் இருசாரார் கருத்துகள் வெளிவந்தன. பெரும்பாலான பார்வையாளர்கள் RA தரம் என்றதும், திரைப்படங்களுக்கு நிர்வாண காட்சிகளுக்காக வழங்கப்படும் RA தரம் என்ற எதிர்பார்ப்புடன் வந்ததால், நாடகத்தில் முத்தக் காட்சியோ, நிர்வாணமோ இல்லாததால் ஏமாற்றத்திற்குள்ளாயினர்.
அதிலிருந்து அக்கினிக்கூத்தின் நாடகங்கள் ஆபாசமானவை என்ற கருத்தை தமிழ் வெகுஜன கலாசார அமைப்புகள் விதைக்கத் தொடங்கின. அக்கினிக்கூத்தின் இருப்பையே மறுதலிப்பவர்கள், எந்த நாடகத்தையும் பார்த்திராதவர்கள் அனைவரும் இணைந்து குழுவினருக்கு எதிரான பணிகளை முடுக்கி விட்டனர்.
தமிழ் ஆசிரியர்கள், வானொலி, தொலைக்காட்சித் தயாரிப்பாளர்கள், சமூக சேவை ஆர்வலர்கள் என்று ஒரு கூட்டம், இளந்தலைமுறையினர் அக்கினிக்கூத்தை நெருங்காதிருக்க வாய்ஜாலங்களையும் மாய்மாலங்களையும் பயன்படுத்தித் தடுப்புச்சுவர் நிர்மாணித்துக் கொண்டிருக்கின்றனர். இளங்கோவன் நாடக இயக்கக் கலையில் பயிற்சிபெற வெளிநாடு சென்றதால் 1994ல் இருந்து 1996 வரை அக்கினிக்கூத்து அமைதியானது.
அக்கினிக்கூத்தின் படைப்புகள் 'நவீனம்' என்ற வார்ப்புக்குள் அடங்குவன. நவீன நாடகம் என்பது குடும்ப சமாச்சாரம், காதல், விவாகரத்து, போதைப் பழக்கம், மது, கற்பு, மதம், பண்பாடு போன்ற உள்ளடக்கத்தில் இருந்து வெகுதூரம் விலகி நிற்பது. நவீன நாடகம் உள்ளடக்க ரீதியிலும் உருவத்திலும் நைந்துபோன realism/ melodrama பாணியைப் பின்பற்றுவதில்லை. நவீன நாடகம், நேர்கோட்டு வடிவ (linear) கதை சொல்லும் பாணி - கதைமாந்தர் சார்ந்த தொடக்கம், உச்சம், வீழ்ச்சி, முடிவு, நாயகன் - வில்லன் மோதலும் சுபமான முடிவும், எல்லோரும் "ஜோரா" கைதட்டிவிட்டு வீட்டுக்கு சந்தோஷமாகப் போகக் கூடிய தீர்வுகளையும் வழங்குவதில்லை. நவீன நாடகம்; உடை, ஒப்பனை, அரங்க அமைப்பு, பொருட்கள், மேடை நிராகரிப்பு, ஒலி-ஒளி, நடிக அசைவுகள், நடிகனின் குரல் பயிற்சி, நடிப்புப் பயிற்சி போன்றவற்றில் துல்லியமாகக் கவனம் செலுத்துகிறது.
நவீன நாடகச் செயல்பாடும் அரசியல் செயல்பாடும் தொடர்புடையவை. அரசியல் கருத்துத் தளங்களையும் ஆளும் வர்க்கத்தினரின் கருத்தமைவுகளையும் விசாரிக்கும் துணிச்சல் நவீன நாடகத்துக்கு உண்டு. நவீன நாடகம் என்பது நிறுவன எதிர்ப்பின் குறியீடாகவே புரிந்துகொள்ளப்பட்டிருக்கின்றது. பார்வையாளர்களுக்கும் நடிகர்களுக்கும் உள்ள நான்காம் சுவரை (Fourth wall) உடைத்து நெருக்கத்தை ஏற்படுத்துகிறது. ஒயிலாக்க பாணி நடிப்பு (stylised acting) பற்றியும் நவீன நாடகம் அக்கறை கொண்டுள்ளது. மரபுக் கலைகளிலிருந்து சில அடிப்படைப் பயிற்சிகள் பெறுவதன் தேவையை உணர்ந்திருக்கிறது.
தேடல் தொடர்பான தகவல்கள்:
சிங்கப்பூரில் தமிழ் நாடகம்.... தற்குறிகளின் கொலு - நாடகக் கலைக் கட்டுரைகள், நாடகம், நவீன, தமிழ், அக்கினிக்கூத்தின், அக்கினிக்கூத்து, சிங்கப்பூரில், கொலு, காவல், நாடக, தற்குறிகளின், நாடகக், கலைக், கட்டுரைகள், தரம், நாடகத்துக்கு, செயல்பாடும், இருந்து, பதிவு, அரசியல், பயிற்சி, என்பது, பாணி, அரங்கேற்றியுள்ளது, கலைகள், arts, drama, நாடகத்தைப், இளங்கோவன், விசாரிக்கும், கலாசார, நாடகங்கள், செய்ய