குப்த பேரரசு

குப்தர் காலத்தில் உலோகவியல் நன்கு வளர்ச்சி பெற்றிருந்தது. உலோக சிலைகளையும் தூண்களையும் வார்ப்பதில் உலோகக் கலைஞர்கள் திறமைமிக்கவர்களாகத் திகழ்ந்தனர். தற்போது பர்மிங் ஹாம் அருங்காட்சியகத்திலுள்ள, சுல்தான் கன்ஞ் என்ற இடத்தில் முதலில் கண்டெடுக்கப் பட்ட செம்பாலான புத்தர் சிலை ஏழரை அடி உயரமும், சுமார் ஒரு டன் எடையும் கொண்டதாகும். குப்தர் காலத்தைச் சேர்ந்த டெல்லி இரும்புத்தூண் வெயில், மழை போன்ற இயற்கை மாற்றங்களுக்கு பல நூற்றாண்டுகளாக ஈடுகொடுத்து இன்றுவரை துருப்பிடிக்காமல் இருப்பது குப்தர் கால உலோகக் கலைக்கு தக்க சான்றாகும்.

குப்தர்கால ஓவியங்களை குவாலியருக்கு அருகிலுள்ள பாக் குகைகளில் காணலாம். அஜந்தா சுவரோவியங்கள் ஜாதகக் கதைகளில் கூறப்பட்டுள்ளவாறு புத்தரின் வாழ்க்கையை சித்தரிக்கின்றன. இலங்கையிலுள்ள சிகிரியா ஓவியங்கள் அஐந்தா ஓவியங்களின் தாக்கத்தை பிரதிபலிக்கின்றன.

குப்தர் கால நாணயங்களும் சிறப்புமிக்கவை. சமுத்திரகுப்தர் எட்டு வகை நாணயங்களை வெளியிட்டுள்ளார். அவற்றில் பொறிக்கப்பட்டுள்ள வாசகங்கள் அவரது சாதனைகளை பறைசாற்றுகின்றன. நாணயங்கள் மீது பொறிக்கப்பட்டுள்ள உருவங்கள் குப்தர்கால நாணயவியல் ஆற்றலுக்கும் புகழக்கும் சான்றுகளாகும். இரண்டாம் சந்திரகுப்தர், தங்கம், வெள்ளி, செம்பு ஆகியவற்றாலான பல்வகைப்பட்ட நாணயங்களை வெளியிட்டுள்ளார்.

இலக்கியம்

வடமொழி குப்தர் காலத்தில் ஏற்றம் பெற்றது. பிரம்மி வரிவடிவத்திலிருந்து நாகரி வரிவடிவம் வளர்ச்சி பெற்றது. காவியம், கவிதை, நாடகம், உரைநடை என பல்வேறு வடிவங்களிலான வடமொழி இலக்கியங்கள் எழுதப்பட்டன. வடமொழி இலக்கியங்களிலேயே மிகச் சிறந்தவை குப்தர் காலத்தைச் சேர்ந்தவையாகும்.

ஒரு சிறந்த கவிஞராகவும் திகழ்ந்த சமுத்திரகுப்தர் ஹரிசேனர் உள்ளிட்ட பல அறிஞர்களை ஆதரித்தார். புகழ்மிக்க 'நவரத்தினங்கள்' இரண்டாம் சந்திரகுப்தரின் அவையை அலங்கரித்தனர். அவர்களில் முதன்மையானவர் காளிதாசர். 'சாகுந்தலம்' என்ற சிறப்பான வடமொழி காவியத்தை அவர் படைத்தார். அது உலகின் தலைசிறந்த நூறு புத்தகங்களில் ஒன்றாகக் கருதப்படுகிறது. மாளவிகாக்னிமித்ரம், விக்ரமூர்வசியம் என்ற மேலும் இரண்டு நாடகங்களையும் அவர் எழுதியுள்ளார். அவர் படைத்த இரு காப்பியங்கள் ரகுவம்சம் மற்றும் குமார சம்பவம். ரிது சம்ஹாரம், மேகதூதம் என்ற கவிதை நூல்களையும் அவர் இயற்றியுள்ளார்.

---