வால்காவிலிருந்து கங்கை வரை - பக்கம் 338

இவ்வளவு பெரிய வெள்ளம் பெருக்கெடுத்து ஓடியபொழுதும், இந்த லக்னௌவிலேயே அன்னியத் துணிகளை மலைமலையாகக் குவித்துக் கொளுத்தப்பட்ட பொழுதும் ஒன்றையும் காதிலே போட்டுக் கொள்ளாமலிருந்த நீ, இப்பொழுது புரட்சிச் சுழலிலே அகப்பட்டவனைப் போல் பேசுகிறாயே!”

     “நீ சொன்னது முற்றிலும் சரி தம்பி! இந்தச் சுழல் உண்மையிலேயே என்னுடைய கால்களைத் தடுமாறச் செய்கிறது! ஆனால், இந்தச் சுழல் எங்கோ ஒரு சிறிய பிரதேசத்தின் சுழல் அல்ல. இது ஒரு பெரிய எல்லையற்ற சுழலாகத் தோற்றமளிக்கிறது; இந்தச் சுழல் உருவத்திலே, ஒவ்வொரு யுகத்திலும் தோன்றும் பலம் பொருந்திய புரட்சி சக்தி மக்களிடையே வெளிப்பட்டிருக்கிறது.”

     “நீ 1857 லிருந்து ஆரம்பிக்கிறாயே சபதர்! ஏன் இவ்வளவு சுற்றி வளைத்துக் கொண்டிருக்கிறாய்?”

     “ஏனா? அதைப்பற்றி விளக்கமாகச் சொல்லட்டுமா?”

     “நான் கேட்க விரும்புகிறேன். மன்னியின் ‘புட்டிங்’ தயாராகிக் கொண்டிருக்கிறது. நாளை ஞாயிற்றுக்கிழமைதான். ஒரு ஆளை அனுப்பி ‘சங்கர் இந்த லக்னௌவிலே, உயிரோடுதான் இருக்கிறான். அவன் மன்னியின் ‘புட்டிங்’ கைத் தின்றுவிட்டுப் படுத்து நெளிந்து கொண்டிருக்கிறான்’ என்று

வீட்டிலே தகவல் சொல்லும்படி செய்யப்பா; இரவு முழுதும் நான் கேட்டுக் கொண்டிருக்கத் தயார்.”

     “சங்கர்! ஆக்ஸ்போர்ட்டிலே நீ இல்லாமல் என்னுடைய வாழ்க்கை ருசி பாதி குறைந்துவிட்டது. அது போகட்டும். கடந்த நூற்றாண்டிலும், இங்கிலாந்தின் அரசியலிலே ஏற்பட்டுள்ள மாற்றங்கள் யாவும் தானே ஏற்பட்டதல்ல. உலகத்தின் போக்கு-செயல்களாலும் பாதிக்கப்பட்டு, நிர்ப்பந்தமாகவே மாற்றமடைந்திருக்கிறது.”

     “இந்த மாற்றங்களின் காரணங்களை நாம் அலசி ஆராய்ந்தால் முக்கியமான காரணம் பொருளாதாரமாகவே இருக்கும் என்று நான் மட்டுமல்ல, இந்தியாவிற்கு வெளியேயுள்ள எல்லாநாட்டு அரசியல் மாணவர்களும் ஒப்புக்கொள்கிறார்கள். 1857ம் வருடம் விழுந்த அடிக்குப் பிறகு நம்நாடு தூங்கிப் போய்விட்டது அல்லது அதன் நடை கண்ணுக்குத் தெரியாத அளவுக்கு மந்தகதி அடைந்துவிட்டது. ஆனால், உலகில் மற்ற தேசங்களிலே மகத்தான மாற்றங்கள் ஏற்பட்டிருக்கின்றன. ஆயிரம் வருடங்களுக்கு முன்னால் ரோம சாம்ராஜ்ய காலத்தில் துண்டு துண்டாகப் போய்விட்ட இத்தாலி 1860ம் வருடம் ஏப்ரல் மாதம் இரண்டாம் தேதி ஒரு ஐக்கிய ராஜ்யமாக இணைவதிலே வெற்றி பெற்றது; நமது வாலிபர்களுக்கு இலட்சியமாக விளங்கும் மாஜினியையும் கரிபாலிட்டியையும் அது உலகிற்கு அளித்தது. ரோம ராஜ்யத்தை அழிப்பதிலே வெற்றி பெற்றாலும் தன்னை ஐக்கியப்படுத்திக் கொள்ள முடியாதிருந்த ஜெர்மனி 1866ம் வருடம் பெரும் பகுதியும் ஐக்கியப்பட்டதோடு, பிரான்ஸை

ஜெயித்த பிறகு 1871ம் வருடம் ஜனவரி மாதம் 18ம் தேதி, ஏறக்குறைய முற்றி