குறுந்தொகை - 137. பாலை - தலைவன் கூற்று

மெல்லியல் அரிவைநின் னல்லகம் புலம்ப நிற்றுறந் தமைகுவெ னாயின் எற்றுறந் திரவலர் வாரா வைகல் பலவா குகயான் செலவுறு தகவே.
- பாலை பாடிய பெருங் கடுங்கோ.

மென்மைத் தன்மையையுடைய அரிவையே நின் நல்ல நெஞ்சம் தனிமையால் வருந்த நின்னைப் பிரிந்து சென்று சென்ற இடத்தே மனம் பொருந்தி இருப்பேனாயின் யான் அங்ஙனம் செல்வதற்குற்ற தக்க வினையின் கண் என்னை நீங்கி இரப்போர் வாராத நாட்கள் பல வாகுக!

முடிபு: அரிவை, நின் அகம் புலம்ப நிற்றுறந்து அமைகுவெனாயின் யான் செலவுறு தகவு இரவலர் வாரா வைகல் பலவாகுக.    

கருத்து: நின்னைப் பிரியேன்; பிரியின் அறப்பயனை இழந்தவனாவேன்.