மூன்றாம் திருமுறை-தேவாரப் பதிகங்கள் - 3.077.திருமாணிகுழி

இத்தலம் நடுநாட்டிலுள்ளது.

சுவாமிபெயர் - மாணிக்கமேனியீசுவரர்.
தேவியார் - மாணிக்கவல்லியம்மை.

3624

பொன்னியல் பொருப்பரையன் மங்கையொரு பங்கர்புன றங்குசடைமேல் வன்னியொடு மத்தமலர் வைத்தவிறல் வித்தகர் மகிழ்ந்துறைவிடம் கன்னியிள வாளைகுதி கொள்ளவிள வள்ளைபட ரள்ளல்வயல்வாய் மன்னியிள மேதிகள் படிந்துமனை சேருதவி மாணிகுழியே

3.077.1

சிவபெருமான் பொன்மயமான இமயமலை அரசனின் மகளான உமாதேவியைத் தன்திருமேனியில் ஒருபாகமாகக் கொண்டவர். கங்கைநீர் தங்கிய சடையில் வன்னிப் பத்திரத்துடன் பொன்னூமத்தம் பூவை அணிந்த வலிய அறிவுருவான அச்சிவபெருமான் வீற்றிருந்தருளும் தலமாவது, வரப்பின்மேல் இளவள்ளைக் கொடிகள் படர்ந்த சேற்றையுடைய வயலில், இள வாளை மீன்கள் துள்ளிப்பாய, இள எருமைகள் அதில் படிந்து வீடுசேரும், நீர்வளமும் நிலவளமுமிக்க திருமாணிகுழி ஆகும்.

3625

சோதிமிகு நீறதுமெய் பூசியொரு தோலுடை புனைந்துதெருவே மாதர்மனை தோறுமிசை பாடிவசி பேசுமர னார்மகிழ்விடம் தாதுமலி தாமரை மணங்கமழ வண்டுமுர றண்பழனமிக் கோதமலி வேலைபுடை சூழுலகி னீடுதவி மாணிகுழியே

3.077.2

ஒளிமிகுந்த திருவெண்ணீற்றினைத் திரு மேனியில் உத்தூளணமாகப் பூசி, தோலை ஆடையாக அணிந்து, தெருக்களில் பெண்கள் உள்ள ஒவ்வொரு இல்லமும் சென்று இசைப்பாடல்களைப் பாடி வயப்படுத்தும் பேச்சுக்களைப் பேசும் சிவபெருமான் மகிழ்ந்து வீற்றிருந்தருளும் தலம் மகரந்தப்பொடிகள் மிக்க தாமரை மலர்கள் மணம் வீசுவதும், வண்டுகள் ஒலிக்கின்ற குளிர்ச்சி பொருந்திய வயல்களையுடையதும், கடலலைகளின் ஓசை மிகுந்ததும் ஆகி விளங்குகின்ற திருமாணிகுழி என்பதாம்.

3626

அம்பனைய கண்ணுமை மடந்தையவ ளஞ்சிவெரு வச்சினமுடைக் கம்பமத யானையுரி செய்தவர னார்கருதி மேயவிடமாம் வம்புமலி சோலைபுடை சூழமணி மாடமது நீடி யழகார் உம்பரவர் கோனகர மென்னமிக மன்னுதவி மாணிகுழியே

3.077.3

அம்பு போன்ற கூரிய கண்களையுடைய உமாதேவி அஞ்ச, கோபமுடைய, தூணிலே கட்டக்கூடிய மதயானையின் தோலை உரித்த சிவபெருமான் வீற்றிருந்தருளும் தலம், நறுமணமிக்க சோலைகளையுடையதும், இரத்தினங்கள் பதிக்கப் பெற்ற மாடமாளிகைகள் நிறைந்த அழகிய தேவலோகத்து நகரமாகிய அமராவதியைப் போன்று நிலைபெற்று விளங்குவதும் ஆகிய திருமாணிகுழியாகும்.

3627

நித்தநிய மத்தொழில னாகிநெடு மால்குறள னாகிமிகவும் சித்தம தொருக்கிவழி பாடுசெய நின்றசிவ லோகனிடமாம் கொத்தலரமலர்ப்பொழிலி னீடுகுல மஞ்ஞைநட மாடலதுகண் டொத்தவரி வண்டுக ளுலாவியிசை பாடுதவி மாணிகுழியே

3.077.4

நாள்தோறும் அநுட்டானம் முதலிய நியமம் பூண்டவனாய்த் திருமால் வாமனவடிவங் கொண்டு மனத்தை ஒரு முகப்படுத்தி வழிபாடு செய்யச் சிவலோக நாயகனாகிய சிவ பெருமான் வீற்றிருந்தருளும் தலம், கொத்தாக மலர்ந்துள்ள பூக்களையுடைய சோலைகளில் சிறந்த மயில்கள் நடனமாட அதைப்பார்த்த வரிகளையுடைய வண்டுகள் நடனத்துக்கு ஒத்தவாறு இசைபாடுகின்ற திருமாணிகுழி ஆகும்.

3628

மாசின்மதி சூடுசடை மாமுடியர் வல்லசுரர் தொன்னகரமுன் நாசமது செய்துநல வானவர்க ளுக்கருள்செய் நம்பனிடமாம் வாசமலி மென்குழன் மடந்தையர்கண் மாளிகையின் மன்னியழகார் ஊசன்மிசை யேறியினி தாகவிசை பாடுதவி மாணிகுழியே

3.077.5

சிவபெருமான் குற்றமில்லாத சந்திரனைச் சடையில் சூடியவர். வல்லசுரர்களின் பழமைவாய்ந்த திரிபுரங்களை அழித்து நற்குண நற்செய்கையுடைய தேவர்கட்கு அருள்புரிந்தவர். அப்பெருமான் வீற்றிருந்தருளும் தலம், நறுமணமிக்க மெல்லிய கூந்தலையுடைய பெண்கள், மாளிகைகளில் தங்கி அழகிய ஊஞ்சலில் ஏறியமர்ந்து இனிமையாக ஊசற்பாட்டுப்பாடி ஆடுகின்ற திருமாணிகுழி ஆகும்.

3629

மந்தமலர் கொண்டுவழி பாடுசெயு மாணியுயிர் வவ்வமனமாய் வந்தவொரு காலனுயிர் மாளவுதை செய்தமணி கண்டனிடமாம் சந்தினொடு காரகில் சுமந்துதட மாமலர்கள் கொண்டுகெடிலம் உந்துபுனல் வந்துவயல் பாயுமண மாருதவி மாணிகுழியே

3.077.6

மலரும் நிலையிலுள்ள மலர்களைக் கொண்டு சிவவழிபாடு செய்த பிரமசாரியான மார்க்கண்டேயனின் உயிரைக் கவரும் மனத்தோடு வந்த காலனின் உயிர் நீங்குமாறு காலால் உதைத்த நீலகண்டனான சிவபெருமான் வீற்றிருந்தருளும் தலம், சந்தன மரங்கள், கரிய அகிற் கட்டைகள் இவற்றைச் சுமந்து மலையிலிருந்து விழுந்து, குளங்களில் பூத்துள்ள சிறந்த மலர்களையும் தள்ளிக் கொண்டு வரும் கெடிலநதியின் நீர் வயல்களில் பாய நறுமணம் கமழும் திருமாணிகுழி ஆகும்.

3630

எண் பெரிய வானவர்க ணின்றுதுதி செய்யவிறை யேகருணையாய் உண்பரிய நஞ்சுதனை யுண்டுலக முய்யவரு ளுத்தமனிடம் பண்பயிலும் வண்டுபல கெண்டிமது வுண்டுநிறை பைம் பொழிலின்வாய் ஒண்பலவி னின்கனி சொரிந்துமண நாறுதவி மாணிகுழியே

3.077.7

எண்ணற்ற தேவர்கள் வணங்கிநின்று துதி செய்யப் பேரருளுடையவனாய் எவரும் உண்ணுதற்கரிய நஞ்சை உண்டு உலகம் உய்யும்படி அருள்செய்த உத்தமனான சிவபெருமான் வீற்றிருந்தருளும் தலமாவது, பண்ணிசை பாடுகின்ற வண்டுகள், பல மலர்களையும் கிளறி, தேனருந்த, வளம்மிக்க பசுமை வாய்ந்த சோலைகளிடத்துச் சிறந்த பலாமரங்களின் இனிய கனிகளிலிருந்து தேனைச் சொரிந்து நறுமணம் கமழ்கின்ற திருமாணிகுழி என்பதாகும்.

3631

எண்ணமது வின்றியெழி லார்கைலை மாமலை யெடுத்ததிறலார் திண்ணிய வரக்கனை நெரித்தருள் புரிந்தசிவ லோகனிடமாம் பண்ணமரு மென்மொழியி னார்பணை முலைப்பவள வாயழகதார் ஒண்ணுதன் மடந்தையர் குடைந்துபுன லாடுதவி மாணிகுழியே

3.077.8

கயிலைமலையின் பெருமையையும், சிவ பெருமானின் அளவற்ற ஆற்றலையும் சிந்தியாது, கயிலைமலையைப் பெயர்த்தெடுத்த வலிய அரக்கனான இராவணனை அம்மலையின்கீழ் நெரித்து, பின் அவன் சாமகானம் பாட அருள்புரிந்த சிவலோக நாயகனாகிய சிவபெருமான் வீற்றிருந்தருளும் தலமாவது, பண் போன்று மென்மொழி பேசபவர்களாய்ப் பருத்த கொங்கைகளையும், பவளம் போன்ற வாயையும், அழகிய ஒளிபொருந்திய நெற்றியையுமுடைய பெண்கள் கையாற் குடைந்து நீராடும் திருமாணிகுழி ஆகும்.

3632

நேடுமய னோடுதிரு மாலுமுண ராவகை நிமிர்ந்துமுடிமேல் ஏடுலவு திங்கண்மத மத்தமித ழிச்சடையெம் மீசனிடமாம் மாடுலவு மல்லிகை குருந்துகொடி மாதவி செருந்திகுரவி னூடுலவு புன்னைவிரை தாதுமலி சேருதவி மாணிகுழியே

3.077.9

பிரமனும், திருமாலும் இறைவனின் அடிமுடி தேடியும், உணராவகை நெருப்புப்பிழம்பாய் ஓங்கி நின்றவர் சிவ பெருமான். அவர்தம் சடைமுடியில் வெண்தாமரை இதழ் போன்ற பிறைச்சந்திரனையும், ஊமத்தை, கொன்றை ஆகியவற்றையும் அணிந்து விளங்குபவர். எம் இறைவரான சிவபெருமான் வீற்றிருந்தருளும் தலமாவது, மகரந்தப்பொடி நிறைந்த மல்லிகை, குருந்து, மாதவி, செருந்தி, குரவம், புன்னை என்ற மணம் கமழும் மலர்கள் நிறைந்த திருமாணிகுழி என்பதாம்.

3633

மொட்டையம ணாதர்முது தேரர்மதி யில்லிகண் முயன்றனபடும் முட்டைகண் மொழிந்தமொழி கொண்டருள்செய் யாதமுதல் வன்றனிடமாம் மட்டைமலி தாழையிள நீர்முதிய வாழையில் விழுந்தவதரில் ஒட்டமலி பூகநிரை தாறுதிர வேறுதவி மாணிகுழியே

3.077.10

மொட்டைத் தலையுடைய சமணர்களும், பேதைமை முதிர்ந்த புத்தர்களும் இறையுண்மையை உணராதவர்கள். முயன்று செய்த வினைகளே பயன்தரும். அதற்குக் கர்த்தாவேண்டா என்று சொல்பவர்கள் அவர்கள். உருட்டிய வழி உருளும். முட்டை போல் தமக்கென ஓர் உறுதி இல்லாத, அவர்கள் சொன்ன சொற்களால் அவர்கட்கு அருள்புரியாத சிவபெருமான் வீற்றிருந்தருளும் இடமாவது, மட்டைகளையுடைய தென்னைகளின் இளநீர்கள் வாழையிலும், பாக்கு மரங்களிலும் விழுந்து குலைகள் சிதற விளங்கும் திருமாணிகுழி ஆகும்.

3634

உந்திவரு தண்கெடில மோடுபுனல் சூழுதவி மாணிகுழிமேல் அந்திமதி சூடியவெம் மானையடி சேருமணி காழிநகரான் சந்தநிறை தண்டமிழ் தெரிந்துணரும் ஞானசம் பந்தனதுசொல் முந்தியிசை செய்துமொழி வார்களுடை யார்கணெடு வானநிலனே

3.077.11

பல பொருள்களை நீர்ப்பெருக்குடன் அடித்து வரும் கெடிலநதி சூழ்ந்த உதவிமாணிகுழியின் மீது, மாலைக்காலப் பிறைச்சந்திரனைச் சூடிய எம் தலைவனான சிவபெருமானின் திருவடிகளை இடைவிடாது தியானிக்கும் அழகிய சீகாழியில் அவதரித்த ஞானசம்பந்தன் சந்தம் நிறைந்த இன்தமிழில் அறிந்துணர்ந்து அருளிய இத்திருப்பதிகத்தை இசையுடன் பாட முற்படுபவர்கள் உயர்ந்த முத்திப் பேற்றைப் பெறுவர்.