முதல் திருமுறை-தேவாரப் பதிகங்கள் - 1.067.திருப்பழனம்

இத்தலம் சோழநாட்டிலுள்ளது.

சுவாமிபெயர் - ஆபத்சகாயர்.
தேவியார் - பெரியநாயகியம்மை.

722

வேதமோதி வெண்ணூல்பூண்டு வெள்ளை யெருதேறிப் பூதஞ்சூழப் பொலியவருவார் புலியி னுரிதோலார் நாதாவெனவு நக்காவெனவு நம்பா வெனநின்று பாதந்தொழுவார் பாவந்தீர்ப்பார் பழன நகராரே.

1.067.1

நாதனே எனவும், நக்கனே நம்பனே எனவும் கூறி நின்று தம் திருவடிகளைப்பரவும் அடியவர்களின் பாவங்களைத் தீர்த்தருளும் திருப்பழனத்து இறைவர் வேதங்களை ஓதிக் கொண்டு மார்பில் வெண்மையான பூணூலையணிந்து கொண்டு வெண்மையான எருதின் மிசை ஏறிப் பூதகணங்கள் புடைசூழப் புலியின் தோலை அணிந்து பொலிவு பெற வருவார்.

723

கண்மேற்கண்ணுஞ் சடைமேற்பிறையு முடையார் காலனைப் புண்ணாறுதிர மெதிராறோடப் பொன்றப் புறந்தாளால் எண்ணாதுதைத்த வெந்தைபெருமா னிமவான் மகளோடும் பண்ணார்களிவண் டறைபூஞ்சோலைப் பழன நகராரே.

1.067.2

மது உண்ட வண்டுகள் பண்பாடி ஒலி செய்யும் அழகிய சோலைகள் சூழ்ந்த திருப்பழன நகரில் இமவான் மகளாகிய பார்வதி தேவியோடு எழுந்தருளிய இறைவர் இயல்பாக உள்ள இரண்டு கண்களுக்கு மேலாக நெற்றியில் ஒரு கண்ணையும், சடைமுடிமேல் பிறையையும் உடையவர். காலனை உதைத்து, அவன் உடலில் தோன்றிய புண்களிலிருந்து குருதி வெள்ளம் ஆறாக ஓடுமாறு, அவனை ஒரு பொருளாக மதியாது புறந்தாளால் அவன் அழிய உதைத்த எந்தை பெருமானார் ஆவார்.

724

பிறையும்புனலுஞ் சடைமேலுடையார் பறைபோல் விழிகட்பேய் உறையுமயான மிடமாவுடையா ருலகர் தலைமகன் அறையுமலர்கொண் டடியார்பரவி யாடல் பாடல்செய் பறையுஞ்சங்கும் பலியுமோவாப் பழன நகராரே.

1.067.3

அடியவர்கள் உயர்ந்தனவாகப் போற்றப்படும் நறுமலர்களைக் கொண்டுவந்து சாத்தி, பரவி, ஆடல் பாடல்களைச் செய்தும் பறை, சங்கு ஆகியவற்றை முழக்கியும், பணிந்தும் இடைவிடாது வழிபடும் திருப்பழனநகர் இறைவர் சடைமேல் பிறையையும், கங்கையையும் உடையவர். பறை வாய் போன்ற வட்டமான, விழிகளையுடைய பேய்கள்வாழும் மயானத்தைத் தமக்கு இடமாகக்கொண்டவர். அனைத்துலக மக்கட்கும் தலைவர்.

725

உரமன்னுயர்கோட் டுலறுகூகை யலறு மயானத்தில் இரவிற்பூதம் பாடவாடி யெழிலா ரலர்மேலைப் பிரமன்றலையி னறவமேற்ற பெம்மா னெமையாளும் பரமன்பகவன் பரமேச்சுவரன் பழன நகராரே.

1.067.4

திருப்பழன நகர் இறைவர் வலிமை பொருந்திய உயரமான மரக்கிளைகளில் அமர்ந்து ஒலி செய்யும் கூகைகள் அலறும் மயானத்தே நள்ளிருளில் பூதங்கள் பாட ஆடியும் அழகிய தாமரை மலர்மேல் உறையும் பிரமனது தலையோட்டில் பலியேற்றும் திருவிளையாடல் புரியும் பெருமானார் எம்மை ஆளும் பரமர் ஆவார். அவர் பகவன், பரமேச்சுவரன் என்பனவாகிய பெயர்களை உடையவர்.

726

குலவெஞ்சிலையான் மதின்மூன்றெரித்த கொல்லே றுடையண்ணல் கலவமயிலுங் குயிலும்பயிலுங் கடல்போற் காவேரி நலமஞ்சுடைய நறுமாங்கனிகள் குதிகொண் டெதிருந்திப் பலவின்கனிக டிரைமுன்சேர்க்கும் பழன நகராரே.

1.067.5

தோகைகளையுடைய மயில்கள், குயில்கள் வாழ்வதும், கடல்போல் பரந்து விரிந்த காவிரி ஆற்றின் அலைகள் மாங்கனிகளையும், பலாவின் கனிகளையும் ஏந்திக் குதித்து உந்தி வந்து கரையிற் சேர்ப்பதுமாகிய திருப்பழன நகர் இறைவர், உயர்ந்த கொடிய மலை வில்லால் அசுரர்களின் முப்புரங்களையும் எரித்தவர். பகைவரைக் கொல்லும் ஆனேற்றையுடைய அண்ணல் ஆவார்.

727

வீளைக்குரலும் விளிச்சங்கொலியும் விழவின் னொலியோவா மூளைத்தலைகொண் டடியாரேத்தப் பொடியா மதிளெய்தார் ஈளைப்படுகி லிலையார்தெங்கிற் குலையார் வாழையின் பாளைக்கமுகின் பழம்வீழ்சோலைப் பழன நகராரே.

1.067.6

ஈரத்தன்மையுடைய ஆற்றுப் படுகைகளில் வளர்ந்த பசுமையான மட்டைகளோடு கூடிய தென்னை மரங்களின் குலைகளில் விளைந்த தேங்காயும், வாழை மரத்தில் பழுத்த வாழைப் பழங்களும், பாளைகளையுடைய கமுகமரங்களில் பழுத்த பாக்குப் பழங்களும் விழுகின்ற சோலைகளால் சூழப்பட்ட திருப்பழன நகர் இறைவர். அழைக்கும் சீழ்க்கை ஒலியும் அழைக்கும் சங்கொலியும், விழவின் ஆரவாரங்களும் ஓயாத ஊரகத்தே சென்று மூளை பொருந்திய தலையோட்டில் பலியேற்பவர். அடியவர்கள் போற்றி வாழ்த்த முப்புரங்களையும் அழித்தவராவார்.

728

பொய்யாமொழியார் முறையாலேத்திப் புகழ்வார் திருமேனி செய்யார்கரிய மிடற்றார்வெண்ணூல் சேர்ந்த வகலத்தார் கையாடலினார் புனலான்மல்கு சடைமேற் பிறையோடும் பையாடரவ முடனேவைத்தார் பழன நகராரே.

1.067.7

திருப்பழனநகர் இறைவர் பொய் கூறாத அடியவர்களால் முறைப்படி ஏத்திப் புகழப் பெறுவர். சிவந்த திருமேனி உடையவர். கரிய கண்டம் உடையவர். முப்புரிநூல் அணிந்த மார்பினை உடையவர். கைகளை வீசி ஆடல் புரிபவர். கங்கை சூடிய சடை முடி மீது பிறையையும், படப்பாம்பையும் ஒருசேர வைத்தவர்.

729

மஞ்சோங்குயர முடையான்மலையை மாறா யெடுத்தான்றோள் அஞ்சோடஞ்சு மாறுநான்கு மடர வூன்றினார் நஞ்சார்சுடலைப் பொடிநீணிந்த நம்பான் வம்பாரும் பைந்தாமரைகள் கழனிசூழ்ந்த பழன நகராரே.

1.067.8

மணம்கமழும் புதிய தாமரை மலர்களையுடைய. வயல்களால் சூழப்பட்ட திருப்பழன நகர் இறைவர், வானகத்தே விளங்கும் மேகங்கள் அளவு உயர்ந்த தோற்றம் உடைய இராவணன் தனக்கு எதிராகக் கயிலை மலையைப் பெயர்க்க அவனுடைய இருபது தோள்களும் நெரியுமாறு கால்விரலை ஊன்றியவர். நச்சுத் தன்மை பொருந்திய சுடலையில் எரிந்த சாம்பலை அணிந்த பெருமானாகிய சிவனார் ஆவார்.

730

கடியார்கொன்றைச் சுரும்பின்மாலை கமழ்புன் சடையார்விண் முடியாப்படிமூ வடியாலுலக முழுதுந் தாவிய நெடியானீடா மரைமேலயனு நேடிக் காணாத படியார்பொடியா டகலமுடையார் பழன நகராரே.

1.067.9

திருப்பழன நகர் இறைவர் மணங்கமழ்வதும் வண்டுகள் மொய்ப்பதுமான கொன்றை மாலை கமழ்கின்ற சிவந்த சடைமுடியையுடையவர். விண்ணளாவிய திருமுடியோடு இவ்வுலகம் முழுவதையும் மூவடியால் அளந்த நெடியோனாகிய திரு மாலும், நீண்ட தண்டின்மேல் வளர்ந்த தாமரை மலர்மேல் விளங்கும் நான்முகனும் தேடிக் காணமுடியாத தன்மையை யுடையவர். திருநீற்றுப் பொடியணிந்த மார்பினையுடையவர்.

731

கண்டான்கழுவா முன்னேயோடிக் கலவைக் கஞ்சியை உண்டாங்கவர்க ளுரைக்குஞ்சிறுசொல் லோரார் பாராட்ட வண்டாமரையின் மலர்மேனறவ மதுவாய் மிகவுண்டு பண்டான்கெழும வண்டியாழ்செய்யும் பழன நகராரே.

1.067.10

வண்டுகள் வளமையான தாமரை மலர்மேல் விளங்கும் தேனாகிய மதுவை வாயால் மிக உண்டு பண்பொருந்த யாழ்போல் ஒலி செய்யும் கழனிகளையுடைய திருப்பழன நகர் இறைவர், கண்களைக் கூடக் கழுவாமல் முந்திச் சென்று கலவைக் கஞ்சியை உண்பவர்களாகிய சமணர்கள் உரைக்கும் சிறு சொல்லைக் கேளாத அடியவர்கள் பாராட்ட விளங்குபவராவார்.

732

. வேய்முத்தோங்கி விரைமுன்பரக்கும் வேணுபுரந் தன்னுள் நாவுய்த்தனைய திறலான்மிக்க ஞான சம்பந்தன் பேசற்கினிய பாடல்பயிலும் பெருமான் பழனத்தை வாயிற்பொலிந்த மாலைபத்தும் வல்லார் நல்லாரே.

1.067.11

மூங்கில் மரங்கள் முத்துக்களோடு ஓங்கி வளர்ந்து மணம் பரப்பும் வேணுபுர நகரில் உள்ள, நாவினால் வல்ல திறன் மிக்க ஞானசம்பந்தன் திருப்பழனப் பெருமான் மீது, பேசற்கினிய பாடல்களாய்த் தன் வாயால் பாடிய இப்பதிகப் பாமாலை பத்தையும், இசையுடன் பாடவல்லவர் நல்லவர் ஆவார்.