செப்போனியாஸ் ஆகமம் - பழைய ஏற்பாடு

¹ மானங்கெட்ட இனமே, ஒன்றுகூடுங்கள்.

² காற்றில் பறக்கும் பதரைப் போல நீங்கள் அடித்துப் போகப்படு முன்பே, ஆண்டவருடைய கடுமையான கோபம் உங்கள் மேல் வந்து விழுமுன்பே, ஆண்டவருடைய கோபத்தின் நாள் உங்கள் மேல் வருமுன்பே கூடிவாருங்கள்.

³ நாட்டிலிருக்கும் எளியோரே, ஆண்டவரின் கட்டளைகளைக் கடைப்பிடிப்பவர்களே, நீங்கள் அனைவரும் ஆண்டவரைத் தேடுங்கள்@ நேர்மையைத் தேடுங்கள், தாழ்ச்சியைத் தேடுங்கள்@ ஆண்டவருடைய கோபத்தின் நாளில் ஒருவேளை உங்களுக்குப் புகலிடம் கிடைக்கலாம்.

⁴ காசா பாலைநிலமாக்கப்படும், அஸ்காலோன் பாழ்வெளியாகும்@ அசோத்து பட்டப் பகலில் தாக்கப்படும், அக்காரோன் வேரோடு வீழ்த்தப்படும்.

⁵ கடற்கரையில் வாழும் இனத்தாராகிய கிரேத்தியர்களே, உங்களுக்கு ஐயோ கேடு! பிலிஸ்தியருடைய நாடாகிய கானானே, ஆண்டவரின் வாக்கு உனக்கு எதிராய் உள்ளது@ குடியிருக்க ஒருவன் கூட இராதபடி நாம் உன்னைப் பாழாக்குவோம்.

⁶ இவ்வாறு அந்தக் கடற்கரை நாடு இடையர்களின் இளைப்பாறுமிடமாகவும், ஆடுகளின் மேய்ச்சல் நிலமாகவும் இருக்கும்.

⁷ அந்தக் கடற்கரையானது யூதாவின் வீட்டாருள் எஞ்சியிருப்பவர்களின் உரிமைச் சொத்தாகும், அங்கே தங்கள் கால்நடைகளை மேய்ப்பார்கள். அஸ்காலோன் வீட்டில் மாலையில் உறங்குவார்கள்@ ஏனெனில் அவர்களுடைய கடவுளாகிய ஆண்டவர் அவர்களை நினைவு கூர்ந்து முன்னைய நன்னிலைக்குக் கொணர்வார்.

⁸ நம் மக்களைப் பழித்து, அவர்களுடைய நாட்டெல்லைகளுக்கு எதிராக வீறாப்புப் பேசிய மோவாபின் வசை மொழிகளையும், அம்மோன் மக்களின் பழிப்புரைகளையும் நாம் கேட்டோம்.

⁹ ஆதலால் மோவாப் சோதோமைப் போலும், அம்மோன் மக்கள் கொமோராவைப் போலும் ஆவார்கள். காஞ்சொறி படரும் காடாகவும், உப்புப் பள்ளங்கள் நிறைந்துள்ள பாழ்வெளியாகவும் என்றென்றும் இருக்கும். நம் மக்களில் எஞ்சினோர் அவர்களைக் கொள்ளையடிப்பர், நம் மக்களில் தப்பினோர் அவர்களை உரிமையாக்கிக் கொள்வர்@ நம் உயிர் மேல் ஆணையாகச் சொல்லுகிறோம்" என்கிறார் இஸ்ராயேலின் கடவுளாகிய சேனைகளின் ஆண்டவர்.

¹⁰ அவர்களுடைய இறுமாப்புக்குக் கிடைக்கும் பலன் இதுவே@ ஏனெனில் சேனைகளின் ஆண்டவருடைய மக்களுக்கு எதிராக அவர்கள் வசை கூறினார்கள், வீறு பேசினார்கள்.

¹¹ ஆண்டவர் அவர்களுக்கு அச்சம் தருபவராய் இருப்பார்@ மாநிலத்தின் எல்லாத் தெய்வங்களையும் அழித்துப் போடுவார்@ மனிதர் அனைவரும் தத்தம் நாட்டில் அவரையே வணங்குவர், புறவினத்தாரின் தீவுகள் அனைத்தும் அவ்வாறே வணங்கும்.

¹² எத்தியோப்பியர்களே, நீங்களுந்தான் நமது வாளால் கொல்லப்படுவீர்கள்.

¹³ வடதிசைக்கு எதிராகத் தம் கையை உயர்த்தி ஆண்டவர் அசீரியாவை அழித்திடுவார்@ நினிவே நகரத்தைப் பாலை நிலம் போல வறண்ட வெளியாக்கிப் பாழாக்குவார்.

¹⁴ அதன் நடுவில் கால்நடைகள் கிடைகொள்ளும், காட்டு மிருகங்கள் யாவும் படுத்துக்கிடக்கும்@ அதன் தூண் தலைப்புகளில் கூகையும் சாக்குருவியும் இராத் தங்கும், பலகணிகளில் ஆந்தைகள் அலறும்@ கதவுகளின் மேல் காக்கைகள் இருந்து கரையும், கேதுரு மர வேலைப்பாடுகள் அழிக்கப்படும்.

¹⁵ நானே இருக்கிறேன், எனக்கு நிகர் யாருமில்லை" என்று தனக்குள்ளே சொல்லிக் கொண்டு அச்சமின்றி இருந்து வந்ததும், அக்களித்து ஆர்ப்பரித்ததுமான நகரம் இதுதானோ? எவ்வளவோ இப்பொழுது பாழாயிற்றே! கொடிய மிருகங்களின் இருப்பிடமாய்விட்டது@ அதனைக் கடந்து போகிறவன் ஒவ்வொருவனும் சீழ்க்கையடித்துக் கையசைக்கிறான்.