பழமொழி நானூறு - பதினெண் கீழ்க்கணக்கு

தமராலும் தம்மாலும் உற்றால், ஒன்று ஆற்றி, நிகராகச் சென்றாரும் அல்லர்;-இவர் திரை நீத்த நீர்த் தண் சேர்ப்ப!-செய்தது உவவாதார்க்கு ஈத்ததை எல்லாம் இழவு.

226

பரந்த அலைகள் வெள்ளம்போல் பரக்கும் நீரையுடைய குளிர்ந்த கடல் நாடனே! தம்முடைய சுற்றத்தாராலும் தம்மாலும் ஒருவருக்கு ஓரிடர் வந்து பொருந்தியவிடத்து ஒரு பொருளுதவி அவர் மனமொப்ப ஒழுகினாருமல்லர். (அதுவன்றி) செய்ததைக்கொண்டு மனம் மகிழாதவர்களுக்கு கொடுத்த பொருள்கள்எல்லாம் இழந்த பொருள்களேயாம்.

கருத்து: பெற்றதைக்கொண்டு மனம் உவவாதார்க்குப் பொருள்கொடுத்தல் ஆகாது.

எவ்வம் துணையாப் பொருள் முடிக்கும் தாளாண்மை, தெய்வம் முடிப்புழி, என் செய்யும், மொய் கொண்டு?- பூப் புக்கு வண்டு ஆர்க்கும் ஊர்!-குறும்பு, இயங்கும் கோப்புக்குழி, செய்வது இல்.

227

பூவின்கண் புகுந்து வண்டுகள் ஒலிக்கின்ற வயல்நாடனே! (எந்நாட்டின்கண்ணும் தடையின்றிச் செல்ல வல்ல ஆணையையுடைய) பேரரசன் (போர் செய்யப்) புகுந்த இடத்து குறுநிலத்தை ஆளுமரசன் எதிர்த்துச் செய்வது ஒன்றுமில்லை (அவன் ஆளுகையின் கீழ் அடங்கியிருப்பான்); (அதுபோல) துன்பமே துணையாக தான் கருதிய பொருளை முடித்தற்குரிய முயற்சி இழவூழே (எதிர்த்து நின்று முடியாதவாறு) முடிக்கின்றவிடத்து முயற்சி அதனை எதிர்த்து வலிந்து என்ன செய்ய முடியும்? (கீழ்ப்பட்டேயிருத்தல்வேண்டும்.)

கருத்து: இழவூழ் எதிர்த்துநிற்குமிடத்துச் செய்யும் முயற்சியாற் பயனில்லையாம்.

சுட்டிச் சொலப்படும் பேர் அறிவினார்கண்ணும், பட்ட விருத்தம் பலவானால், பட்ட பொறியின் வகைய, கருமம் அதனால்,- அறிவினை ஊழே அடும்.

228

குறித்துச் சொல்லப்படும் மிகுந்த அறிவு உடையாரிடத்தும் உளவாய குற்றங்கள் பலவானால் (அதற்குக் காரணம்) பட்டபொறியின் வகைய கருமம் பொருந்தியிருக்கின்ற பழவினையின் இருக்கும் செயல்கள் என்பதறியப்படும் வழிப்பட்டனவாய் ஆகையால் நல்லறிவினை முன் செய்த ஊழே பேதைமையாக்கும்.

கருத்து: மிகுந்த அறிவுடையாரிடத்தும்குற்றங் காணப்படுதல் ஊழானாயது என்பதாம்.

அம் கண் விசும்பின் அகல் நிலாப் பாரிக்கும் திங்களும், தீங்குறுதல் காண்டுமால்;-பொங்கி, அறைப் பாய் அருவி அணி மலை நாட!- உறற்பால யார்க்கும் உறும்.

229

மிகுந்து கற்பாறையின்கண் பாயாநின்ற அருவிகளையுடைய மலை நாடனே! அழகிய இடமகன்ற ஆகாயத்தினின்று மிகுந்த வெண்மையான கிரணங்களை வீசுகின்ற மதியும் கோளாற் றீமை யடைதலைக் காண்கின்றோம். (ஆதலால்) உறற்பால யார்க்கும் உறும் - தமக்கு வரக்கடவ துன்பங்கள் தம்மை மாற்றும் இயல்புடையாரே யெனினும் விடாது அவரைச் சென்று பற்றி நிற்கும்.

கருத்து: வருவது வந்தே தீரும். அதை மாற்றுதலும் ஆகாது. அதன்பொருட்டு வருந்துதலும் ஆகாது.

கழுமலத்தில் யாத்த களிறும் கருவூர் விழுமியோன் மேற்சென்றதனால், விழுமிய வேண்டினும், வேண்டாவிடினும், உறற்பால தீண்டா விடுதல் அரிது.

230

சீகாழியின்கண் கட்டப்பட்டிருந்த யானையும் கருவூரின்கண் இருந்த சிறப்புடையவனாகிய கரிகாற்சோழனிடத்துச் சென்று அவனைக் கொண்டுவந்து அரசுரிமையை எய்துவித்ததால் சிறந்த பொருள்களை விரும்பினும் விரும்பாதொழியினும் அடைதற்குரியவாய் நின்ற நன்மைகள் அவனைஅடையாது நிற்றல் இல்லை.

கருத்து: தமக்கு வரவேண்டிய நன்மைகள் வந்தே தீரும்.