குறுந்தொகை - 65. முல்லை - தலைவி கூற்று

வன்பரல் தெள்ளறல் பருகிய இரலைதன் இன்புறு துணையொடு மறுவந் துகளத் தான்வந் தன்றே தளிதரு தண்கார் வாரா துறையுநர் வரனசைஇ வருந்திநொந் துறைய இருந்திரோ எனவே.	5
- கோவூர்கிழார்.

தோழி! வலிய பருக்கைக் கற்களினிடத்தேயுள்ள தெளிந்த நீரைக் குடித்த ஆண்மான் இன்பத்தை நுகர்தற்குரிய தன்னுடைய பெண்மானோடு களிப்பினாற் சுழன்று துள்ளி விறையாடா நிற்கவும் இங்கே வாராமல் சென்ற இடத்தே தங்கிய தலைவர் மீண்டும் வருதலை விரும்பி மிகவருந்தித் தங்கும் பொருட்டு உயிர் வைத்துக் கொண்டிருந்தீரோ வென்று கேட்பதற்கு மழைத்துளியைத் தருகின்ற தண்ணிய கார்ப் பருவம் வந்தது.

முடிபு: உறையுநர் வரல் நசைஇ இருந்திரோ எனக் கார் வந்தன்று.     

கருத்து: கார்ப்பருவம் வந்தபின்பும் தலைவர் வந்திலர்.