குறுந்தொகை - 60. குறிஞ்சி - தலைவி கூற்று
(தலைவனது பிரிவையாற்றாத தலைவி தோழியை நோக்கி, "தலைவர் என்னோடு அளவளாவாம லிருப்பினும் அவரைக் காணுமாத்திரத்தில் எனக்கு இன்பம் பிறக்கும்; அஃதும் இப்பொழுது இலதாயிற்று" என்று கூறியது.)
| குறுந்தாட் கூதளி யாடிய நெடுவரைப் பெருந்தேன் கண்ட இருங்கால் முடவன் உட்கைச் சிறுகுடை கோலிக் கீழிருந்து சுட்டுபு நக்கி யாங்குக் காதலர் நல்கார் நயவா ராயினும் |
5 |
| பல்காற் காண்டலும் உள்ளத்துக் கினிதே. | |
| - பரணர். |
தோழி! குறிய அடியையுடைய; கூதளஞ்செடி அசைந்த உயர்ந்த மலையிலுள்ள பெரிய தேனடையைக் கண்ட காலின்மையின் எழுந்து நிற்றற்கு இயலாமல் இருத்தலையுடைய முடவன் உள்ளங்கையாகிய சிறிய குவிந்த பாத்திரத்தை குழித்து அம்மலையின் கீழே இருந்தபடியே அத்தேனிறாலைப் பலமுறை சுட்டி உள்ளங்கையை நக்கி இன்புற்றதைப் போல தலைவர் தண்ணளி செய்யாராயினும் விரும்பாராயினும் பலமுறை பார்த்தலும் எனது நெஞ்சிற்கு இனிமை தருவது.
முடிபு: காதலர் நல்கார் நயவாராயினும் பல்காற் காண்டலும் இனிது.
கருத்து: தலைவரைக் காணாதிருத்தல் துன்பத்தைத் தருவதாயிற்று.
தேடல் தொடர்பான தகவல்கள்:
குறுந்தொகை - 60. குறிஞ்சி - தலைவி கூற்று, இலக்கியங்கள், தலைவி, குறிஞ்சி, குறுந்தொகை, கூற்று, பல்காற், நல்கார், பலமுறை, காதலர், காண்டலும், தலைவர், எட்டுத்தொகை, சங்க, கண்ட, முடவன், நக்கி