குறுந்தொகை - 4. நெய்தல் - தலைமகள் கூற்று

நோம்என் நெஞ்சே நோம்என் நெஞ்சே இமைதீய்ப் பன்ன கண்ணீர் தாங்கி அமைதற் கமைந்தநங் காதலர் அமைவிலர் ஆகுதல் நோம்என் நெஞ்சே.
- காமஞ்சேர் குளத்தார்.

எனது நெஞ்சம் வருந்தா நிற்கும் இமைகளைத் தீயச் செய்யும் கருவியைப் போன்ற வெம்மையைஉடைய எனது கண்ணீரைத் தாம் துடைத்து அளவளாவுவதற்கு அமைந்த நம் தலைவர் இப்பொழுது மனம் பொருந்தாரய்ப் பிரிந்திருத்தலால் எனது நெஞ்சம் வருந்தா நிற்கும்.

முடிபு: காதலர் அமைவிலராகுதலால் நெஞ்சு நோவா நிற்கும்.     

கருத்து: தலைவர் இப்பொழுது உடனிராமையால் என் நெஞ்சு வருந்தும்.