குறுந்தொகை - 371. குறிஞ்சி - தலைவி கூற்று
(தலைவன் வரைவிடை வைத்துப் பிரிந்த காலத்தில் வேறுபட்டதலைவியை நோக்கி, “நீ வேறுபடாமல் ஆற்றல்வேண்டும்” என்றதோழிக்கு, “யான் என்செய்கேன்! யான் ஆற்றியிருப்பினும் காமம்பெரிதாகலின் என் வரைத்தன்றி வேறுபாடு உண்டாயது” என்று தலைவிகூறியது.)
| கைவளை நெகிழ்தலும் மெய்பசப் பூர்தலும் மைபடு சிலம்பின் ஐவனம் வித்தி அருவியின் விளைக்கும் நாடனொடு மருவேன் தோழியது காமமோ பெரிதே. |
|
| - உறையூர் முதுகூற்றனார். |
தோழி! மேகங்கள் பொருந்துகின்ற மலைப்பக்கத்தில் மலைநெல்லை விதைத்து அருவியினாலே விளைக்கின்ற நாட்டையுடைய தலைவனால் என்கைகளில் உள்ள வளைகள் நெகிழ்தலையும் மெய்யின்கண்ணே பசலை பரத்தலையும் பெறேன்; ஆயினும் அக்காமம் பெரிது!
முடிபு: தோழி, நாடனொடு வளை நெகிழ்தலும் பசப்பூர்தலும் மருவேன்; காமம் பெரிது.
கருத்து: காமம் என்வரைத்தன்றி மிக்கது.
தேடல் தொடர்பான தகவல்கள்:
குறுந்தொகை - 371. குறிஞ்சி - தலைவி கூற்று, இலக்கியங்கள், தலைவி, குறுந்தொகை, குறிஞ்சி, கூற்று, தோழி, பெரிது, மருவேன், காமம், நாடனொடு, சங்க, நெகிழ்தலும், எட்டுத்தொகை