குறுந்தொகை - 300. குறிஞ்சி - தலைவன் கூற்று

குவளை நாறுங் குவையிருங் கூந்தல் ஆம்பல் நாறும் தேம்பொதி துவர்வாய்க் குண்டுநீர்த் தாமரைக் கொங்கின் அன்ன நுண்பல் தித்தி மாஅ யோயே நீயே, அஞ்ச லென்றவென் சொல்லஞ் சலையே	5
யானே, குறுங்கா லன்னங் குவவுமணற் சேக்கும் கடல்சூழ் மண்டிலம் பெறினும் விடல்சூ ழலனான் நின்னுடை நட்பே.
- சிறைக்குடி ஆந்தையார்

குவளை மலரின் மணத்தைவீசுகின்ற தொகுதியாகிய கரியகூந்தலையும் ஆம்பல் மலரின் மணத்தைவீசும் தேன் பொதிந்த சிவந்தவாயையும் ஆழமாகிய நீரில் வளர்ந்த தாமரைப் பூந்தாதைப் போன்ற நுண்ணிய பல தேமற் புள்ளியையுமுடைய மாமை நிறமுடையாய் நீ! யான் பிரிவேனென்று கருதி அஞ்சாதேகொளென்ற எனது சொல்லைக் கேட்டு அஞ்சாதே கொள்; யான்! நினதுநட்பினை குறிய காலையுடையஅன்னப் பறவைகள் குவிதலையுடைய மணலின் கண்ணே தங்கியிருக்கும் கடல் வளைந்த நில வட்டத்தைப்பெறினும் விடுதலை நினையேன்.

முடிபு: மாஅயோயே, நீ அஞ்சலை; யான் நின்னுடை நட்பு விடல்சூழலன்.     

கருத்து: நின்னைப் பிரியேன்.