குறுந்தொகை - 292. குறிஞ்சி - தோழி கூற்று
(தலைவன் இரவுக்குறிக்கண் வந்து சிறைப்புறத்தானாக, அதனைஅறிந்த தோழி தலைவிக்குக் கூறுவாளாய், “நம் தாய், ஒரு நாள் தலைவன் வந்ததை அறிந்தாள்; அறிந்த அன்று முதல் முன்னையினும் மிகப் பாதுகாத்து வருகின்றாள்” என்று கூறி விரைவில் வரைந்து கோடலே நன்று என்பதைப் புலப்படுத்தியது.)
| மண்ணிய சென்ற ஒண்ணுத லரிவை புனல்தரு பசுங்காய் தின்றதன் தப்பற் கொன்பதிற் றொன்பது களிற்றொ டவணிறை பொன்செய் பாவை கொடுப்பவுங் கொள்ளான் பெண்கொலை புரிந்த நன்னன் போல |
5 |
| வரையா நிரையத்துச் செலீஇயரோ அன்னை ஒருநாள் நகைமுக விருந்தினன் வந்தெனப் பகைமுக ஊரின் துஞ்சலோ இலளே. |
|
| - பரணர். |
தாய் ஒரு நாளில் நகுதலை உடையமுகத்தைக் கொண்ட விருந்தினனாகித் தலைவன் வந்தானாக பகைவர் மாறுபடும் போர்க் களத்தின்கண் உள்ள ஊரினரைப்போல பலநாளும்துயில் செய்தல் இலள்; நீராடும் பொருட்டுச் சென்ற ஒள்ளிய நெற்றியை உடையபெண் அந்நீர்கொணர்ந்த பசுங்காயைத் தின்றதாகிய குற்றத்திற்காக எண்பத்தொரு ஆண்யானைகளோடு அவளது நிறையை உடைய பொன்னால்செய்த பாவையைக் கொடுப்பவும் கொள்ளானாகி அப்பெண்ணைக் கொலைசெய்த நன்னனைப் போல நீக்குதல் இல்லாத நரகத்தின்கண் சென்று துன்புறுவாளாக.
முடிபு: அன்னை, ஒரு நாள் விருந்தினன் வந்தெனத் துஞ்சல்இலள்; நிரையத்துச் செலீஇயர்.
கருத்து: அன்னையின் காப்பு இப்பொழுது மிக்கது.
தேடல் தொடர்பான தகவல்கள்:
குறுந்தொகை - 292. குறிஞ்சி - தோழி கூற்று, தோழி, இலக்கியங்கள், கூற்று, குறிஞ்சி, தலைவன், குறுந்தொகை, நிரையத்துச், அன்னை, சென்ற, விருந்தினன், நாள், எட்டுத்தொகை, தாய், சங்க