குறுந்தொகை - 171. மருதம் - தலைவி கூற்று

காணினி வாழி தோழி யாணர்க் கடும்புன லடைகரை நெடுங்கயத் திட்ட மீன்வலை மாப்பட் டாஅங் கிதுமற் றெவனோ நொதுமலர் தலையே.
- பூங்கணுத்திரையார்.

தோழி! இப்பொழுது பார்ப்பாயாக; புதுவருவாயாகிய மிக்க புனலையும் அடைந்த கரையையுமுடைய ஆழமான குளத்தின்கண் அமைத்த மீனுக்குரிய வலையின்கண் விலங்கு அகப்பட்டாற் போல அயலாரிடத்து வரைவுக்குரிய இம் முயற்சி என்ன பயனுடைத்து?

முடிபு: தோழி, காண்; நொது மலர்தலை இது எவன்?     

கருத்து: அயலார் வரைவுமேற்கொள்வதனாற் பயனொன்று மில்லை.