28. ஞானம் பிரியாமை - ஞானக் குறள்

பிறந்திட மாலிடம் பேரா திருப்பின் இறந்திடம் வன்னி யிடம்.

271

சாகா திருந்த தலமே மவுனமது ஏகாந்த மாக விரு.

272

வெளியில் விளைந்த விளைவின் கனிதான் ஒளியி லொளியா யுறும்.

273

மறவா நினையா மவுனத் திருக்கில் பிறவா ரிறவார் பினை.

274

குருவாம் பரநந்தி கூடல் குறித்தாங் கிருபோது நீங்கா திரு.

275

சுந்திரச் சோதி துலங்கு மிடமது மந்திரச் சக்கரமு மாம்.

276

தூராதி தூரஞ் சொல்லத் தொலையாது பாராப் பராபரம் பார்.

277

ஈரொளி யீதென் றிறைவ னுரைத்தனன் நீரொளி மீது நிலை.

278

அந்தமு மாதியு மில்லா வரும்பொருள் சுந்தர ஞானச் சுடர்.

279

இதுமுத்தி சாதனமென் றேட்டில் வரைந்து பதிவைத் தனன்குரு பார்.

280