புலம்பெயர்ந்த நாடுகளில் தமிழ் நாடகக்கலை - நாடகக் கலைக் கட்டுரைகள்

தமிழ் நாடகக் கலை தமிழ்க் கல்வி நிலையங்களிலே பெருமளவு மாற்றத்தையும் வளர்ச்சியையும் ஏற்படுத்தியுள்ளது என்றே சொல்லவேண்டும். சிறுவர்களிடையே நடிப்புத் திறனையும், பேச்சுத்திறனையும், தமிழிலே ஈடுபட வேண்டும் என்ற உணர்வையும் தூண்டியிருக்கிறது. குறிப்பாக அவுஸ்திரேலியாவில் உள்ள தமிழ்க் கல்வி நிலையங்கள் கடந்த பத்து வருடங்களாக முன்னேறி வருவதை அவதானிக்கக் கூடியதாக உள்ளது. இம்முயற்சிகளில் ஈடுபட்ட ஆசிரியர்களும், மாணவர்களும், பெற்றோரும் பாரட்டப்பட வேண்டியவர்கள்.

வானொலி நாடகங்கள் :

வானொலி நாடகங்களைப் பொறுத்த மட்டில் புலம் பெயர்ந்த நாடகங்களைப் பிரதிபலிக்கின்ற பின்னணியைக் கொண்ட நாடகங்கள் மிக மிகக் குறைவாகவே ஒலிபரப்பாகி உள்ளன. தமிழ் நாட்டுச் சூழலையும், ஈழப் பின்னணியைக் கொண்ட நாடகங்களுமே அதிகப்படியாக ஒலிபரப்பாகின. இவற்றிலும், உள்ளூர்க் கலைஞர்களும், இளைஞர்களும் பங்குபற்றி நடித்த நாடகங்கள் மிகமிகக் குறைவே. இவ்வகை நாடகங்கள் பொழுது போக்காக அமைந்தனவே அன்றிச் சமுதாயத்தில் எந்தவிதமான தாக்கத்தையும் ஏற்படுத்தவில்லை என்றே சொல்லலாம். சிட்னியைப் பொறுத்தமட்டில் இளைஞர்களை வானொலி நாடகக் கலையில் ஈடுபடுத்தி, தாம் வாழும் புலம்பெயர்ந்த நாட்டின் பின்னணியில் ஈழத்து மண்வாசனை செறிந்த வானொலித் தொடர் நாடகம் ஒன்றை ஒலிபரப்பிய பெருமை சிட்னித் தமிழ் முழக்கம் வானொலியையே சாரும். இந்த நாடகம் சமுதாயத்தில் பெரிய மாற்றத்தை ஏற்படுத்தாவிட்டாலும், இளைஞர்கள் தமிழ்ப்பற்றுக் கொள்ளவும் தமிழ் நாடகக் கலையில் ஈடுபடவும் தூண்டுதலாக அமைந்தது என்றால் அது மிகையாகாது. தக்க ஊக்குவிப்பும், ஆதரவும் இல்லாமற் போனமையால் இதை வழங்கிய இளைஞர்களும் தமது நாடகக் கலை முயற்சிகளைக் கைவிட்டு விட்டார்கள்.

புலம்பெயர்ந்த நாடுகளில் நாடகக் கலைக்கு உள்ள இடர்ப்பாடுகள் :

மேடைநாடகங்கள் :

1. நல்ல நாடகப் பிரதிகளை எழுதித் தயாரிக்கக்கூடிய வல்லமையுள்ள படைப்பாளிகள் குறைவு.

2. கொள்கை பரப்புவதற்கு நாடகத்தை ஒரு சாதனமாகக் கொள்ளாது. பொழுது போக்காக எடுத்துக் கொள்வது.

3. தாக்கமான கதையையோ, சரித்திரைத்தையோ அல்லது இலக்கியத்தையோ நாடகமாக்கினால், பார்ப்போர் அதில் அதிக நாட்டம் கொள்ளாது இருப்பது.

4. நாடகங்களில் நகைச்சுவையைப் பெரிதும் எதிர்பார்ப்பது.

5. நகைச் சுவை நாடகங்களை எழுதுவதும், தயாரிப்பதும் இலகுவான செயலன்று.

6. கோமாளித் தனத்தையும், உடல் ஊனம், பேச்சு ஊனம், ஆண் பெண் வேற்றுமை முதலிய மனித உணர்ச்சி தொடர்பான பொருள்களை வைத்து நகைச்சுவை உண்டுபண்ணுகிறோம் என்று நினைத்து நாடகங்களை அரங்கேற்றுவது.

7. நாடகப் பிரதியைத் தயாரித்து, முறையாக, நாடகத்தைப் பழகாமல் அரைகுறையாக வாயில் வந்தபடி வசனங்களைப் பேசி நடிக்க முயல்வது.

8. நடிகர்கள், தயாரிப்பாளர் முதலியோர் அதிகப்படியான நேரத்தைச் செலவிடத் தயாராக இயலாதிருப்பது.

9. பலர் சேர்ந்து ஒருகூட்டு முயற்சியாக நாடகங்களை அரங்கேற்றாது, ஓரிருவரே எல்லா ஒழுங்குகளையும் கவனிக்க எத்தனிப்பது.

10. ஒலி, ஒளிச் சாதனங்கள் திறமையாக அமையாது தரமான நாடகங்களைக் கெடுத்து விடுவது மட்டும் அல்லாது பார்போரின் வெறுப்பையும் தேடித் தருவது.

11. காட்சி அமைப்புகளிலே, தொழில் நுட்பங்களிலே பெருமளவு தங்கியிருந்து அரங்கேற்றத்தின்போது அவை சரியாக இயங்காது விட்டுவிடுவது.

12. நாடகங்கள் சமூக நலனுக்கு ஒரு தேவை என்று கருதி அதைத் தாமாகவே தேடிச் சென்று பார்க்க வேண்டும் என்ற ஆவல் இரசிகர்களுக்கு இல்லாமை.

13. நுழைவுச் சீட்டுகளை நடிகர்களும், தயாரிப்பாளர்களும் கொண்டு திரிந்து விற்கவேண்டிய நிர்பந்தம்.

14. தயாரிப்புச் செலவுகள் அதிகமாக இருப்பதோடு சமூக உதவி நிதிக்காகத் தயாரிக்கப்படாத தயாரிப்புகள் நட்டத்தில் முடிவது.